出院了~

我琴日下午出院了，今日打返入院時發生的野~

5月10日，都係考試日，個日係考Eng Oral，我學校SW係課室門口等我，我考完，我就同佢一齊去左輔導室，原本我地約左傾完一齊出去食Lunch，點知由原本傾我考完試之後會參加咩活動，例如敬師日個D，點知傾下傾下講到我個排的情緒....

因為之前發生的事，令我好辛苦，我居然成日行街都會望下D樓可以邊度跳落去，又會成日想衝出馬路。我更加仲係自己無意識的情況下買左一盒又一盒的藥。仲要自己買左先知，我覺得自己已經唔再係以前的我，自己都覺得自己好恐怖，我同左學校SW講。

學校SW原本同我商量提早覆診，點知打比社康，社康話個日無門診。之後社康去左我學校，佢地話怕我個幾日都捱唔到，因為我自己都唔知自己做緊咩，之後佢地同學校SW車左我去A&E，第一次咁去A&E，有排等。等左成粒鐘，先去到分流站，我係緊急，等左30mins左右見左醫生，佢叫我簽紙入院，如果唔簽，就要法官判，我知即係點都要入，咁就簽左。社康佢地都咁講，唔簽就好難出院…

等下等下，因為6,7點，社康同學校SW都有野做了，佢地要走，我自己入病房。

入到去，好多姑娘我已經唔識了，好陌生，好驚，等左一陣，先有醫生見，我同當值醫生講左入院原因，見完，就因為之後係星期六日都無醫生見。我個2日係病房好唔適應，係咁哭，有時都唔知自己點解會咁，加上又訓唔到，搞到日頭好攰，又扒起度，好眼訓.....當我有小小清醒的時候，有2個女仔走過黎，原來我地早係FB識的，但未見過對方。但我的心情都唔係好好，都無咩同佢地接觸。

到星期一，見我主診醫生，比佢話我唔應該簽名入黎，我應該死都唔簽，佢完全唔明白當時的情況，佢叫我做到4樣野先比我出院，1)要開開心心 2)要同其他院友玩 3)唔可以再有幻聽 4)要食得訓得...我同佢講第3,4樣我控制唔到，但佢死都話我控制到，又話我再係咁就調我病房住半年。個陣見完佢，我哭左好耐，我覺得醫生一D都唔明白我，個日我都係咁哭，佢都無開藥比我。星期三，又再次見佢，同佢講左我入院前的狀態，佢話我嚴重左，佢開左D藥比我食，等我訓到.....之後因為星期五六日都係假期，所以都係無醫生見。食左D藥，我訓到小小，但日間都係好眼訓，D藥又令我好口乾，好辛苦。

係個個星期，C同學校SW都有探我，學校SW帶左D書比我睇，我用呢幾日已經睇完了。而中途有院友入左黎，佢好亂，姑娘係咁話我：XXX(我個名)，你睇下你個FD呀~唉~我都唔知可以點><

到21日，星期二，醫生又黎見我，佢話比行街紙我，我星期四又見佢個陣因為我成日哭，所以開左D抗抑鬱藥比我，但份量好小，食左我係咁發惡夢，成日醒，我星期五同佢講，佢無理，佢反而同我講，佢28日開始放大假，放到6月10日，佢話因為呢2日CP放大假，所以星期一打比CP，如果CP比我出，我就出得，但如果唔得，或者佢無覆，我就6月10日後先出得。我同佢講星期一CP全日門診，但佢話佢都係，但會試下的，又問我以我認識的CP會唔會因門診而唔覆佢？我話唔會。佢又話我今次入院入得好無辜，我根本唔應該入。佢叫我記住佢1,3先門診，我就算同人講個D野都要1,3先講，只要我返去覆診，佢一定唔會叫我入院，但如果我其他時間就會好似今次咁入左A&E，就要入去，一住又要住咁耐，好唔抵....佢呢D係話緊我？定教緊我？

其實我係21日，見左CP，因20日中心社工探我時，佢話佢6月會被調走，已經令我即刻哭，哭左成個下午，加上21日，呀媽又同我講舅公因忽發心臟病發去世了，所以我個日見CP好多情緒，哭得好勁，所以因為咁，我好怕CP唔比走。

因為咁，我之後的星期六日，我哭了，因為我一方面好唔開心，一方面怕醫生聯絡唔到CP或CP唔比我出，而有排住，院友見到，同我祈禱，因為我真係好驚。到星期一，我真係好緊張，但某院友都係同我同一個主診醫生，佢同我講，醫生約左佢家人6月4日見...下？醫生又同我講佢放到6月10日？佢講大話？我好驚。即刻問姑娘，姑娘又話佢之後唔係放假，但佢地根本無睇，但我都好驚~我再偷偷地問另一個姑娘，佢有睇，我只同我擺手...擺手係佢唔係放假定佢唔係度？我真係好驚~

探病時，我同呀媽講，醫生講大話，佢6月4日已經返左黎係醫院，佢唔係放到10日，我呀媽唔明，但我同佢解解下，醫生叫我去見佢，入到去，佢同我講：你出得院，但下一句：你想唔想死?你想我點答？我答想，你咪唔比我出？我死都答唔想啦....佢又話我有無後悔過入黎，住左咁耐覺唔覺得好無辜個D，之後佢見呀媽，叫呀媽唔好煩住我，唔好影響我情緒個D.....見完，呀媽返屋企攞衫比我出院，我有D時間同院友講，佢地知道後都好開心，但我真係好擔心佢地...好想佢地都可以出院.....有D唔係好熟的院友都走過黎問我住左幾耐，我同佢地講17日，之後佢地話：你就好啦，咁快就走得....唉~我覺得好耐，但我知道係PSY黎講算快...

返到屋企，好多野執，今日返左學校，見左學校SW，講左之後的安排，我知道我D時間一定要安排得好忙好忙，呢幾日都會有野做，但我真係好驚好驚..... 我一靜落黎就會爆，因為我而家係度逃避緊D負面情緒，唔比自己去唸><

打左好多，唔好意思.....